Santali Poem

ᱥᱚᱲᱚᱠ ᱨᱮᱱᱟᱝ ᱵᱟᱱᱟᱨ ᱯᱟᱦᱴᱟ
ᱦᱚᱨ ᱫᱷᱟᱨᱮ ᱨᱤᱧ ᱫᱟᱨᱮ ᱟᱠᱟᱱ
ᱢᱟᱬᱟᱭ ᱢᱟᱬᱟᱭ ᱥᱤᱛᱩᱝ ᱵᱮᱲᱟᱨᱮ
ᱩᱢᱩᱞᱤᱧ ᱮᱢᱟᱢ ᱠᱟᱱᱟ
ᱥᱟᱹᱨᱫᱤ ᱥᱤᱛᱩᱝ ᱠᱟᱹᱢᱤ ᱞᱟᱝᱜᱟ ᱨᱮ
ᱤᱧᱟᱜ ᱩᱢᱩᱞᱨᱮᱢ ᱡᱤᱨᱟᱣᱜ ᱠᱟᱱᱟ
ᱦᱚᱲᱢᱚ ᱩᱫᱽᱜᱟᱹᱨ ᱟ`ᱡᱮᱫ ᱠᱟᱛᱮ
ᱫᱟᱲᱮᱧ ᱮᱢᱟᱢ ᱠᱟᱱᱟ
ᱫᱟᱨᱮ ᱜᱮᱥᱮᱱᱮᱢ ᱢᱤᱛᱟᱹᱧ ᱠᱟᱱᱟ-
ᱠᱷᱟᱹᱞᱤ ᱫᱟᱨᱮ ᱫᱩᱧ ᱵᱟᱝ ᱠᱟᱱᱟ |

ᱵᱤᱨ ᱵᱩᱨᱩᱨᱮ ᱡᱤᱱᱛᱤ ᱯᱤᱯᱤᱲᱤ
ᱛᱟᱦᱮᱱ ᱠᱟᱱᱟᱠᱚ ᱠᱩᱞ ᱵᱟᱱᱟ
ᱥᱤᱛᱩᱝ ᱡᱟᱹᱯᱩᱫ ᱨᱟᱵᱟᱝ ᱨᱮᱭᱟᱲ
ᱰᱮᱨᱟᱧ ᱮᱢᱟᱠᱚ ᱠᱟᱱᱟ
ᱤᱧ ᱪᱮᱛᱟᱱᱨᱮ ᱪᱮᱬᱮ ᱪᱤᱯᱨᱩᱡ
ᱨᱟᱜᱮᱫ ᱠᱟᱱᱟᱠᱚ ᱪᱮᱨᱚᱵᱮᱨᱚ
ᱩᱱᱠᱩ ᱛᱟᱦᱮᱱ ᱞᱟᱹᱜᱟᱱ ᱤᱧ ᱫᱩᱧ
ᱯᱟᱠᱟ ᱫᱚᱞᱟᱱ ᱠᱟᱱᱟ
ᱫᱟᱨᱮ ᱜᱮᱥᱮᱱᱮᱢ ᱢᱤᱛᱟᱹᱧ ᱠᱟᱱᱟ-
ᱠᱷᱟᱹᱞᱤ ᱫᱟᱨᱮ ᱫᱩᱧ ᱵᱟᱝ ᱠᱟᱱᱟ |

ᱰᱟᱹᱨ ᱯᱮᱨᱮᱡ ᱵᱟᱦᱟᱜ ᱠᱟᱱᱟ
ᱵᱚᱝᱜᱟ ᱵᱳᱨᱳᱠᱚ ᱵᱟᱦᱟᱭᱮᱫ ᱠᱟᱱᱟ
ᱡᱤᱣᱤ ᱦᱚᱲᱢᱚ ᱡᱤᱭᱟᱹᱲ ᱞᱟᱜᱟᱱ
ᱡᱚᱢ ᱦᱩᱧ ᱮᱢᱟᱢ ᱠᱟᱱᱟ
ᱦᱚᱲᱢᱚ ᱢᱟᱭᱟᱢ ᱵᱮᱱᱟᱣ ᱞᱟᱜᱟᱱ
ᱦᱚᱲᱢᱚ ᱫᱟᱲᱮ ᱥᱟᱨᱥᱟᱣ ᱞᱟᱜᱟᱱ
ᱦᱚᱲᱢᱚ ᱟᱡᱟᱨ ᱥᱟᱦᱟ ᱞᱟᱜᱟᱱ
ᱤᱧ ᱫᱩᱧ ᱨᱟᱱ ᱠᱟᱱᱟ
ᱫᱟᱨᱮ ᱜᱮᱥᱮᱱᱮᱢ ᱢᱤᱛᱟᱹᱧ ᱠᱟᱱᱟ-
ᱠᱷᱟᱹᱞᱤ ᱫᱟᱨᱮ ᱫᱩᱧ ᱵᱟᱝ ᱠᱟᱱᱟ |

ᱜᱟᱹᱰᱤ ᱢᱳᱴᱚᱨ ᱠᱟᱹᱨᱜᱟᱲ ᱠᱷᱚᱱ
ᱟ`ᱜᱽᱨᱟ ᱫᱷᱩᱶᱟᱹ ᱳᱰᱳᱠᱚᱜ ᱠᱟᱱᱟ
ᱚᱱᱟ ᱦᱟᱛᱟᱣ ᱠᱟᱛᱮ ᱡᱤᱣᱤᱫ
ᱦᱚᱭ ᱦᱩᱧ ᱮᱢᱟᱢ ᱠᱟᱱᱟ
ᱞᱚᱞᱚ ᱦᱚᱭ ᱫᱩᱧ ᱨᱮᱭᱟᱲ ᱮᱫ-ᱟ
ᱢᱟᱹᱭᱞᱟᱹ ᱦᱚᱭ ᱫᱩᱧ ᱱᱤᱨᱲᱟᱹ ᱮᱫ-ᱟ
ᱡᱤᱵᱽ ᱡᱤᱭᱟᱹᱞᱤ ᱵᱟᱧᱪᱟᱣᱜ ᱞᱟᱜᱟᱱ
ᱤᱧᱫᱩᱧ ᱥᱟᱹᱨᱛᱷᱤ ᱠᱟᱱᱟ
ᱫᱟᱨᱮ ᱜᱮᱥᱮᱱᱮᱢ ᱢᱤᱛᱟᱹᱧ ᱠᱟᱱᱟ-
ᱠᱷᱟᱹᱞᱤ ᱫᱟᱨᱮ ᱫᱩᱧ ᱵᱟᱝ ᱠᱟᱱᱟ|

ᱚᱲᱟᱜ ᱫᱩᱣᱟᱹᱨ ᱨᱮ ᱞᱟᱜᱟᱣ ᱟᱠᱟᱱ
ᱯᱟᱹᱲ ᱥᱮᱱᱮᱨ ᱟᱨᱦᱚ` ᱫᱷᱟᱨᱱᱟ
ᱠᱟᱬᱵᱟ ᱱᱟᱦᱮᱞ ᱤᱥᱤ ᱟᱨᱟᱬ
ᱪᱟᱥᱨᱮ ᱞᱟᱜᱟᱣᱜ ᱠᱟᱱᱟ
ᱚᱲᱟᱜ ᱫᱩᱣᱟᱹᱨ ᱠᱚᱢ ᱥᱟᱡᱟᱣ ᱟᱠᱟᱫ
ᱰᱨᱮᱥᱤᱝ ᱴᱮᱵᱩᱞ ᱰᱟᱭᱱᱤᱝ ᱴᱮᱵᱩᱞ
ᱜᱤᱛᱤᱡ ᱯᱟᱨᱠᱚᱢ ᱠᱟᱯᱟᱴ ᱥᱤᱞᱯᱤᱧ
ᱡᱚᱛᱚᱜᱮ ᱤᱧᱟᱜ ᱠᱟᱱᱟ
ᱫᱟᱨᱮ ᱜᱮᱥᱮᱱᱮᱢ ᱢᱤᱛᱟᱹᱧ ᱠᱟᱱᱟ-
ᱠᱷᱟᱹᱞᱤ ᱫᱟᱨᱮ ᱫᱩᱧ ᱵᱟᱝ ᱠᱟᱱᱟ |

ᱦᱟᱛᱚᱢ ᱠᱩᱢᱟᱹᱝ ᱢᱟᱢᱚ ᱢᱟᱹᱢᱤ
ᱫᱮ~ᱵᱷᱟᱹᱜᱟᱹᱱ ᱠᱚ ᱞᱮᱠᱟ
ᱟᱨᱦᱚ’ ᱥᱟᱹᱜᱟᱹᱭ ᱢᱮᱱᱟᱜ ᱟᱢ ᱥᱟᱶ
ᱵᱷᱤᱛᱟᱹᱨ ᱵᱚᱝᱜᱟ ᱞᱮᱠᱟ
ᱵᱟᱧᱪᱟᱣ ᱚᱪᱚ ᱟᱹᱧᱢᱮ ᱤᱧᱦᱚ’
ᱟᱢᱥᱟᱶ ᱟᱢᱨᱤᱱ ᱯᱮᱲᱟ ᱞᱮᱠᱟ
ᱡᱚᱛᱚᱱ ᱠᱟᱹᱧᱢᱮ ᱦᱟᱨᱟ ᱠᱟᱹᱧ ᱢᱮ
ᱤᱧᱦᱩᱧ ᱟᱢᱤᱡ ᱜᱤᱫᱽᱨᱟᱹ ᱠᱟᱱᱟ
ᱫᱟᱨᱮ ᱜᱮᱥᱮᱱᱮᱢ ᱢᱤᱛᱟᱹᱧ ᱠᱟᱱᱟ-
ᱠᱷᱟᱹᱞᱤ ᱫᱟᱨᱮ ᱫᱩᱧ ᱵᱟᱝ ᱠᱟᱱᱟ|

ᱥᱮᱨᱢᱟ ᱯᱩᱨᱤ ᱨᱟᱦᱞᱟ ᱨᱤᱢᱤᱞ ᱦᱚ`
ᱫᱷᱟᱹᱨᱛᱤ ᱯᱩᱨᱤᱛᱤᱧ ᱚᱨ ᱟᱹᱜᱩᱭᱟ
ᱨᱤᱢᱤᱞ ᱥᱟᱞᱟᱜ ᱥᱟᱹᱜᱟᱹᱭ ᱢᱮᱱᱟᱜ
ᱡᱟᱹᱲᱤ ᱦᱚᱧ ᱟᱹᱜᱩᱭᱮᱫ ᱠᱟᱱᱟ
ᱤᱧ ᱵᱟᱝᱠᱷᱟᱱ ᱫᱷᱟᱹᱨᱛᱤ ᱢᱟᱞᱚᱴᱚᱜ
ᱡᱤᱵᱽ ᱡᱤᱭᱟᱹᱞᱤ ᱡᱚᱛᱚᱠᱚ ᱢᱩᱪᱟᱹᱫᱚᱜ
ᱱᱚᱶᱟ ᱫᱷᱟᱹᱨᱛᱤ ᱵᱟᱧᱪᱟᱣ ᱞᱟᱜᱟᱱ
ᱤᱧ ᱫᱩᱧ ᱡᱤᱭᱤ ᱠᱟᱱᱟ
ᱫᱟᱨᱮ ᱜᱮᱥᱮᱱᱮᱢ ᱢᱤᱛᱟᱹᱧ ᱠᱟᱱᱟ-
ᱠᱷᱟᱹᱞᱤ ᱫᱟᱨᱮᱫᱩᱧ ᱵᱟᱝᱠᱟᱱᱟ|